عاشیقین سازی

باخيشيندا آي عاشيق دومانلي داغلار هاواسي
اوره گينده بوتون عالمده اولان غم ياراسي
دامجي- دامجي توكورسن گوز ياشيني ساز اوسته
اوخويورسان((نبي)) ني، ((چنلي بئلي))، ((قيزقالاسي))

آتلاناركن قووسان الده تاتار
اوجادان سسلنيرسن
داغلاري، دونگه لري سير ائديرسن
چوللرين لاله لريندن دئيرسن
سازي ديللندير عاشيق گلدي باهار

او سازين توت آغاجيندان يارانيب
اودير كي ماهنيلارين توت كيمي شيريندي سنين
سيلكه ليرسن سازي نين بوتاغلارين
بال كيمي توت توكولور يوردوموزا
سسيني قووزا وار اولسون دهنين

دورموشام بو آغاجين آلتيندا
كونلومو ايگنه ائديب
روحومو پارچا
تيكيره م بير چاديرا
ساليرام خاطيره لر كرديسينه
توتلاريندان ييغيرام، دولدورورام ميس كاسايا
انيرم سردابايا
آنامي سسله ييره م
كاسامي گورسه ديره م
توت يئييرسن آي آنا؟
قاف داغي پالتار ايچينده چيغيرير:
ميراثا قالسين او توت، گورموسن اللريمي ياناـ يانا
گون گئچير، ايل دولانير، ياز گئدير، پاييز گلير
قيش اولور
يئل اسير كولك قوپور، قار ياغير دام- داشيما
هورويور توت آغاجين
يوگورور سردابايا
باخمايير گوز ياشيما…

یازان:  عمران صلاحي

دولان بولود – نصرت کسمنلی

دولان بولود

يامان دولوب بو بولود
ياغاجاقدير اينديجه
غضبي شيمشک اولوب
چاخاجاقدير اينديجه
دونياني سو ايچينده
بوغاجاقدير اينديجه
نه دئييم کي ياغماسين؟

قارا بولود؛ بوز بولود
نه دردين وارسا؛ اونوت
اوزاتميشام اليمي
من توتوم اته ييندن
سنده اللريمدن توت

اوچاق يئل قاناديندا
قوناق گول بوداغينا
دوشک بير نغمه کيمي
داغلارين دوداغينا

گورلا منيم سسيمله
اوخوماق هوسيمله
سن دئه؛ من قولاق آسيم
اوخويوم؛ مني دينله
قوي سينه مه باشيني

بو بولود؛ قارا بولود
بنزه يير يارا بولود
من دريا ايچينده يم
گور ياغدين هارا بولود؟
هارا چکدين قوشونو…

هر داملا شئه دنه سي
شئه ده سنه دونه سي
ياغيب اوزونو يورما
نه ييم وارکي؛ سونه سي؟
آت عينادين داشيني
گويلردي سنين يوردون
باشيمين اوسته دوردون
اوجاليغا آغلاماق
ياراشمير؛ آي بولودوم
سيل گوزونون ياشيني…

یازان:  نصرت کسمنلي

آمان هی – بختیار وهاب زاده

آمان هی

سئوگيم منه قاناد وئردي، اوچوردو

من اوزومدن يوخارييام، آمان هئي

سن قلبيمده قلبيم کيمي وورماسان

بوتوو دئييل، من يارييام، آمان هئي

اوز اليمله موهورله نير گون به گون

اوز اليمله باغلاديغيم بو دوگون

ايلجيني غيب ائله ين بير عومرون

قضا ووران قاتارييام، آمان هئي

نيشان آلديم، من هدفي گورمه ديم

ضرر گوردوم، بير يول نفعي گورمه ديم

اوز حسيمدن او طرفي گورمه ديم

اوز- اوزومون چپرييم، آمان هئي

سن يوخسان سا… من بير هئچم، هده رم

سنين ايچون بير طالعم، قده رم

سئوگيم قده ر، محبتيم قده رم

من اوزومون اينکارييام، آمان هئي

یازان:  بختيار وهاب زاده

آرزولار ائلی

هئي…!

آرزولارين ائلليگي! آرزولارين ائلليگي!

من آرزولار ائلينه

گلين اولماق ايسته ديم

اوزاقلاردا

اوزاق- اوزاق زيروه لرده

يووالانماق ايسته دي توراجيم

اوچار قانادينا د اش باغلاندي

آغير- آغير

داغا سويكنمك ايسته دي

دومان- چيسكين، پرده- پرده قاتيلاشدي

اوجالدان قانادلار

اوچجوردان آرزولار

دوووارلي ائللرين

عدالت سيز بوجاقلاريندا

يارالاندي

كورلاندي.

یازان:  نگار خياوي

ای آشیق – ماهنی سؤزو

آی عاشیق

سني ((تارين)) آي آشيق! پاسلي سازين تاقچادان ائندير!

كوينه ييندن چيخاريب شوقيله باس باغرينا، ديندير!

بيزه بير تازه ناغيل، بير تازا سوز سويله بو سازدا

آشيقا عاشيق اولان ائللريني بيرجه سئويندير!

شاققالا كوهنه ناغيللاردا اولان اژدهاني

بير ايچيم وئرمه يه سو مينلريله جان آلاني!

نه زامان دئو جانيني ساخلاياجاقدير شوشه ده!

ال اوزالت شيشه ني سال!

نعره تپ، جاميني سيندير! جانين آل!

يئني دن بير هاوا چال!

داش هاواسي

قيش هاواسي

ايكي قارداش هاواسي

آندلي يولداش هاواسي

ائله وور زخمه ني، سيمدن قور آتيلسين آلوو اولسون

عالمه شعله ياييلسين

بو قوروموشلار آليشسين

لئهي قالخسين، سو بولانسين

قورويا ياش دا قاريشسين

اوديله هاي- كوي اوجالسين

هاردا كار واردي ائشيتسين

نه كي لال وارسا دانيشسين

يئني دن بير هاوا چال!

يئني دن بير هاوا چال!

يادا خاطيرده ديريلت

اونودولموش، آياق آلتيندا ازيلميش ائلينين تاريخيني

بيرده تاريخده كي داستانلارا جان وئر!

جاني وار بيرجه تكان وئر

بيزه چال آرزي گونوندن!

بير او گوندن كي

چنلي بئلده آلاچيقلار قورولا، توفان اولا

چاي، بولاغ طغيان ائديب چيمخيرالار، قايناشالار

اولكه دن ياد باغينا آخديقي آرخلار قان اولا

اوبا- اويماق تيكيله، كيشنه يه آتلار

اوينايا گويده قيلينجلار

سيلديريم، داش قايا آت چاپماغا بير جولان اولا

گوجلو، قورخماز دليلر ييغناغي بير ميدان اولا

((بللي احمد)) له ((دميرچي اوغلو)) لار ((ايواز باني)) لار، هم ده ((نيگار)) لار

((قوچ كوراوغلو)) يلا چاديردا ييغيشان دووران اولا

تولكو، چاققال يئرينه قافلان اولا

آصلان اولا

اوندا ظولمتده گونش پارلاياجاق، نور ساچاجاق

مرد، نامرد سئچيليب اوندا سيناقدان چيخاجاق

اوندا قورخاق قاچاجاق

یازان:   شهرك ميرزا

آ دوستلار – ماهنی سوزو

آ دوستلار

يئنه قاشلارينيز نيه چاتيلدي

دئيين قلبينيزده نه وار، آ دوستلار؟

سويله يين هر ياندان سيخيرمي سيزي

قالين داش ديوارلي حصار، آ دوستلار؟

توخوندي قلبيمه بو گون بير باخيش

بيليره م چوخ ويروب اوني قار- ياغيش

سيزي قورخوتماسين نه بوران، نه قيش

گله ر موسمينده بهار، آ دوستلار!

بوشا گئتمه يه جك آخان بو قانلار

بو وحشي قيرقينلار، وحشي تالانلار

بير گون دوگولنلر، آياقلانانلار

اوز انتقاميني آلار، آ دوستلار!

وقت اولار بورادا دگيشه ر زمان

داغلارين دوشيندن چكيله ر دومان

خلقين عاشيقلري اركين باشيندان

صدفلي سازيني چالار، آ دوستلار

شرفلي بير اميد، بويوك بير اينام

بيزي دوشونديرير هر سحر- آخشام

هارايا اوز قويسام، هارادا اولسام

الينيز اليمده قالار، آ دوستلار

یازان:  عثمان ساريوللي

سیزه سلام گتیرمیشم + ماهنی سؤزو

سیزه سالام گتیرمیشم

ياخشي پيسي قانان لاردان
ائل دردينه يانان لاردان
قفسده کي اسلان لاردان
سيزه سلام گتيرميشم

زورا بلي دئين لرده ن
قارين قورساق يئين لرده ن
تانا کورا گئين لرده ن
سيزه سلام گتيرميشم

بوج ايچره بوغولان لاردان
يواسي داغيلان لاردان
ظلومده ن باغيران لاردان
سيزه سلام گتيرميشم

جاهاز لارين ساتان لاردان
قاردون اوسته ياتان لاردان
ايستک ليسين آتان لاردان
سيزه سلام گتيرميشم

غيرتلي آغ بيرچک لرده ن
مظلوم قره لچک لردن
اياقلانميش چيچک لردن
سيزه سلام گتيرميشم

ارباب لارين فشاريندان
ساوالانين وقاريندان
زرتشت مين شعاريندان
سيزه سلام گتيرميشم

قلبي سينيق خان چوباندان
قبري ايتگين ستارخاندان
بابک له جاويدان دان
سيزه سلام گتيرميشم

کسروي نين دياريندان
اوغوز نبي تباريندان
تبريزين حکماواريندان
سيزه سلام گتيرميشم

قوجا پولسوز آليزلاردان
قفل لانان آغيزلاردان
نجاراوغلو تک دازلاردان
سيزه سلام گتيرميش

یازان:  نجاراوغلو