هوشنگ جعفری دن حاجیلار شعری

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

دوزلو اوغلان یاهو گروپ

دوزلو اوغلان وبلاگینین یاهو گروهوندا عضو اولون تا یئنی خبرلر ، گوزل مطالیب ، آذربایجانی و تورکیه موزیک لر ، تورکجه اس ام اس لر و تایسیز شکیل لر سیزین ایمیلیزه گلسین بونا گؤره آشاغی شکلین اوستونده کلیک ائدین و امنیتی کد کلمه لرینی یازین و سونرا جوین کلمه سینه تیکله یین تا عضو اولاسیز

join

Click to join DUZLU_OGHLAN

دوزلو اوغلان وبلاگینین خبرنامه سی
اگر دوزلو اوغلان وبلاگیندا یازیلان یئنی مطالیبی اوخوماق ایسته ییرسیز اوندا آشاغی لینک اوستونده کلیک ائدین و ایمیلیزی و امنیتی کد کلمه لرینی یازین و ثبتی وورون سونرا سیزه بیر ایمیل گله جک اوردا لینکی کلیک ائدین تا ثبت نام تکمیل اولسون تا یئنی مطالیب سیزین ایمیلیزه اوتوماتیک یوللانسین

Subscribe to Duzlu oğlan دوزلو اوغلان by Email

حاجی لار + استاد هوشنگ جعفری

گئدیرسیز مکه یه تکمیل اولا ایمان حاجیلار
وئره آللاه سیزه ده حوری و قلمان حاجیلار
فیکر ائدیرسیز کی قیامت ده ده وار خر تو خری
آقا وقتین اولاجاق هر کین تاج سری
آلاجاق دور و برین حوری و قلمان و پری
وئره جکلر سیزه ده روضه رضوان حاجیلار 

گئدیرسیز مکه یه بو ملتی آلداتماق اوچون
اوزادا ساققالیزی جینسی باهالاتماق اوچون
یاکی شیطان کیشی لر شیطانا داش آتماق اوچون
شیطانی وورماگینان کوهنه مسلمان حاجیلار
*
هئچ اولوب بیر گئجه سیز باش چکه سیز قونشولارا
گؤره سیز قونشونون آروادی عجب گییدی قارا
اری بیچاره آجیندان اؤزونو چکدی دارا
سیز دوغوردان حاجی سیز یا کی یالاندان حاجیلار؟
*
گر پولون چوخدو کیشی وئرگینن آجلاری دویور
گؤرموسن دولت الان مین دیلینن خالقی سویور
بیزی بیچاره ائدیب سیزلری آواره قویور
بو نه یاتماقدی یاتیبسیز سیزی قرآن حاجیلار؟
*
گاه گئدیرسیز وئریسیز کربلادا صداما پول
ائله بیر کره مکاندا سالیسیز ائششه یه چول
من اؤلوم کیمدی قویان جنگ ده آروادلاری دول
یا گؤرن بیز دئییریک صداما بهتان حاجی لار؟
*
قاراگونلر گرک هر یئرده وار ایرانه گله؟
نییه قویموللار بو ایران سر و سامانه گله؟
هئچ گؤروبسوز سیز عربلر ده خراسانه گله؟
او شه کرب و بلادیر بو خراسان حاجیلار
*
خراسان شاهینه یوخ فرقی امام حسینین
یوخ امام ائیله امام دیر بو منیم دیر او سنین؟
قولو سینسین گؤروم آللاه بئله قانون کسه نین
سیزه دیوان ائله سین شاه شهیدان حاجی لار
*
سیزه آللاه دئییب آج قوی بیزی پول وئر عربه
ییغ آپار وار یوخووی وئرگینن او بی ادبه
ائیله بیر یول وار عزیزیم یولووی سال حلبه
گؤر آجیندان نه چکیر اوردا نریمان حاجی لار
*
جفر آباددا الان ملت آجیندان قیریلیر
قیرمیزی باشماق اوچون بیر جوت اوشاقلار ویریلیر
پولی چوخلاری یئییب ملتین حاققین جیریلیر
چوخو تاپمیر گییه تا اینینه تومان حاجیلار
*
هله قوی کئیف ائله سین مکه ده استانداریمیز
یاخشی ماهردی شعار وئرمه یه فرمانداریمیز
یاری میز خواب جهالتده دیر قالدی یاریمیز
یاریمیزدا اوره یی غمدن اولوب قان حاجی لار
*
زنگان آباد اولا ویران اولا استاندارا نه
خان خوله جرٌ جهنم کیشی فرماندارا نه
چوخ گناه بیزده دی بو بی گناه انسانلارا نه
بولارا نه کی اولوب ات نئچه تومان حاجیلار
*
کیشی بونلار گلیب استانه کی تا کئیف ائله سین
باهادی تاکسی چؤرک قارداش ، حسن بورج ائله سین
گلیب هر کس بورا بو شهرده بیر پول کوره سین
خالقی آلداتماغادی بیر بئله احسان حاجیلار
*
سؤز اولور حضرت استاندار اولور کوهه روان
یئیه صبحانه ، سونا ائیلیه تفریح کنان
ساهات اون بیرده گلیر دفترینه مرد جوان
یئتیشیر وقت اذان باغلانیر هر یان حاجیلار
ایشه واخ قالمیری ساکی سیزه قربان حاجیلار
*
کس سسین شاعر بدبخت قوتار سؤزلریوی
یوخوسوزلوق چیخادار صبحه کیمی گؤزلریوی
گئده زنگانی یاتیب سن دؤیوسن دیزلریوی؟
دردی فرهنگ دی اولماز بونا درمان حاجیلار
هوشنگ جعفری

شهریار گئدنده + استاد هوشنگ جعفری

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

شهریار گئدنده

باخدیم دالیسیجا یار گئدنده ،

بیر یولدا دئدیم باخار گئدنده ،

باخدی قاپیدان کئچنده گولدو ،

بیلمیردی اورک اومار گئدنده ،

باغلاندی دیلیم اورکدن آمما ،

آز قالدی چئکم (چَکم ین زنجان شیوه سی) هاوار گئدنده ،

گئتمه گئدیسن ؟ یاواش – یاواش گئت ،

جانیم بیلی سن چیخار گئدنده ،

دؤندر گؤزونو خومار – خومار باخ ،

قویما منی ده ، خومار گئدنده ،

سن سیزلیگه دوزمگیم چتیندی ،

گل جانیمی آل قوتار گئدنده ،

سندن سورا عشقی نئیلیرم من ،

آل عشقینی ده آپار گئدنده ،

مئهر ایله نوازش ائیله بلکه ،

گول بیتسین اورک ده قار گئدنده ،

من گؤر نه دئییردیم اؤز اؤزوملن ،

قول بوینوما بیر سالار گئدنده ،

بیچاره اورک بولود کیمین دیر ،

گؤردوکجه سنی دولار گئدنده ،

دای « جعفری » بسدی خلعت ،

سؤز اوستادی شهریار گئدنده ،

ایراندا هونر دیلنچی لیک دیر ،

باخما کی تاپار ویقار گئدنده ،

شاعیر : اوستاد هوشنگ جعفری

کئفلی کئفلی + هوشنگ جعفری

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

کئفلی ،کئفلی ،

گونشدیر الده جامیم کئفلی ،کئفلی ،

اؤزوم کئفلی ، مرامیم کئفلی ،کئفلی ،

ییخیلمام ساقی تئز – تئز تؤک چاخیر دان ،

هله واردیر داوامیم کئفلی ،کئفلی ،

همیشه کئفلییم کئفسیزلر ایچره ،

کئچیر هر صوبح و شامیم کئفلی ،کئفلی ،

اورک وولکان کیمی اود توتدو یاندی ،

آلیشدی پیشدی خامیم کئفلی ،کئفلی ،

ایچیم یاندی آلیشدیم دفتر اوسته ،

آلوولاندی کلامیم کئفلی ،کئفلی ،

سن هر سمته دئسن من سجده قیللام ،

منیم سن سن ایمامیم کئفلی ،کئفلی ،

اگر سندن سووای بیر اؤزگه سیندن ،

خوشوم گلسه حرامیم کئفلی ،کئفلی ،

گولوم هر یئرده سن واردیر اوزاقدان ،

سنه چوخ – چوخ سلامیم کئفلی ،کئفلی ،

بوتون دونیاده عشق اولسون محبت ،

بودور آخیر پیامیم کئفلی ،کئفلی ،

شاعر : اوستاد هوشنگ جعفری

گئنه آرغین گئنه یورغون گئنه بیر غملی اؤره ک + هوشنگ جعفری

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

گئنه آرغین گئنه یورغون گئنه بیر غملی اؤره ک

یارالی قوش کیمی چیرپینمادادیر

گینه نیسگیلی اؤره ک یانمادادیر

کؤز گؤز اوسته قالانیر نئیله مه لی

آلیشیر دالغالانیر نئیله مه لی

سرمی نه آتا بیلدی نه آنا

گئدیرم چله خانا-چله خانا

من گرک یار یانان اودلاردا یانام

یار دئیب یار دولانام

نه روا عشقی دانام-من باها نغمه سیم

نغمه آدیم -گلمیشم عشق زلیخا یارادیم

هانی لیلی-هاتنی شیرین

قویام خسرتلی باشی دیزلرینه

بی باخام غمله دولان گؤزلرینه

دئیم عاشیق اودی اودلاردا یانا-

ننه دئیم چله خانا-چله خانا

گئدیرم دونیا بویو داردی منه

یانماسام عشق اودونا عاردی منه

آجیمیش عشقی شیرین لشدیره ره م

آیری دوشموش ائلی بیرلشدیره ره م

داغیت اؤلکمده دیسین قوشلاریمیز

اوخشاسینلار بیزی تای توشلاریمیز

قوی دیریلسین اؤلن احساسلاریمیز

من او غفلت جاداسین تاژلامادیم

یانمیان لامژا کیمی لاپلامادیم

نازلی یار گئدی ایاق ساخلامادیم

یار ائشیکدن اؤزون اودلاندیردی

من ایچیم یاندی منی یاندردی

سانما نغمه ال آیاق چالمادادیر

یارین عشقی جانیمی آلمادادیر

عشق سلطانی فرج وئرسه بیزه

سئل اولوب گؤز یاشی دؤنمز دنیزه

شیشه عمری چالیب سیندیرارام

عشق اوتوندا اؤزومی یاندیرارام

دولدوروب کاسه صبری جالارام

چیخارام داغلارا های های سالارام

نازلی یار گئتسه نه جور تک قالارام

ایسته ییر باشیمه دنیا دولانا

گئدیرم چیله خانا- چیله خانا

وامقین جاندان گئچن عذراسی یام

من یانان مجنونیمین لیلاسی یام

نغمه والاسی یام عاشق شیداسیام

عشقیده فرهاد وشیرینن باشام

اصلی یه عشق عالمینده یولداشام

کیم بوکر دونیا باغین باغچاسینا

کیم بوکر عشقی عاقیل بوغچاسینا

سانما یین عشق اؤلوبدیر دیریدی

نغمه عاشیق سیراسینان بیریدی

تاپارام عشقیمی هر یئر ده اولا

قویمارام تک دولانیب رنگی سولا

ایندی کی گئتمه لی یم هر نه اولا

عشق دریادی عاقیل قطره سیدی

نغمه نین سون سسی عاشیق سسی دی

منه دونیاده ااشز عشقیم بسیدی

سؤیله مندن گنه بیر غملی سلام

سئودیگیمنن منی آیری سالانا

گئدیرم چله خانا- چیله خانا

سن آغیر داغ کیمی داغلار باشیسان

بیر عوموردور سینه ده غم داشیسان

سن کی زنگانیلارین یولداشیسان

بیر چیغیر بلکه یاتانلار اویانا

گئدیرم چله خانا-چله خانا

شاعر : اوستاد هوشنگ جعفری

گوزل زنگان – هوشنگ جعفری

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

گوزل زنگان

گوزل زنگان شهرلرین باشیدی

لعل و مرجان توپراغیدی داشیدی

ایران اوزوک زنگان اوزوک قاشیدی

سلام زنگان سلام آرزیم دیله گیم

سن اولماسان قدرت تاپماز بیله گیم

گزمه لیدی زنگان چله خانا سی

گورمه لیدی سولطانیه بناسی

آی قهرمان ایگیت لرین آناسی

سلام سیزه سلام سیزین ائلیزه

سلام گوزل گویچک تورکو دیلیزه

گوزل زنگان سنه اوره ک یانان یوخ

دردلریوی درک ائله ییب قانان یوخ

آنا یوردو سنی دوغرو سانان یوخ

باخانی وار اصفهانین کاشانین

یوخ کیمسه سی آنام یوردو زنگانین

اویرنجی لر گلیب بوردا یاشاللار

اوزلرینی دولدوراللار داشاللار

آتی مینیب دولاییدان آشللار

زنگان باخار گوزگوسونه اوزونه

یاش چیله نر چیلله خانا دوزونه

آچ قوللارین سال بوینوما جان کیمی

قوی چالیشیم داماریندا قان کیمی

ائل غمینده قلبیم اولوب شان کیمی

بیر شاعیرم اوره ک باغلی ائلیمه

چالیشیرام فرهنگیمه دیلیمه

اوستاد هوشنگ جعفری

دری سین سویدولا گؤز باخدی ،دیلی آخ دئمه دی + هوشنگ جعفری

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

دری سین سویدولا گؤز باخدی ،دیلی آخ دئمه دی

بیر گئجه آسدیلار آسلانلاری دان قیشقیردی ،

قورقوشوملار سینه سینده گول آچان قیشقیردی ،

زالی لار سوردولا دؤرت دؤره دن اندیشه لرین ،

قدد و قامت یئره دوشدوکجه آذان قیشقیردی ،

قیزلارین ناله سی قووزاندی بولودلار دؤشونه ،

هاوالار شاققیدی گؤردوم ساوالان قیشقیردی ،

قارالیقلاردا قارانلیق تؤره دن بایقوشلار ،

چاپدیلار آیه لر اوستونده ، قرآن قیشقیردی ،

بیری نین قیش تایاسین دامدا گامیشلار (جامیشلار ) سؤکدو ،

بیر آریق توخلو آجیندان باجادان قیشقیردی ،

گئجه بیر واقت بئله سونجولدو تیکانلار دؤشونه ،

وای دئیر کن دوداغین یومدو تیکان قیشقیردی ،

هر گئجه هر یئنی بیر بابکه نئشتر دگدی ،

آت گؤلوندن قارا قاشقا اوجادان قیشقیردی ،

داغلارین شیهه سی آز قالدی یئری شاققالاسین ،

قولاغیم باتدی دئدیم یئر گؤی الان قیشقیردی ،

سازی سیندیردیلا آل ماهنی لارین قوینوندا ،

هر سازین توزلو تئلیندن مین اوزان قیشقیردی ،

دری سین سویدولا گؤز باخدی ،دیلی آخ دئمه دی ،

سویولان گولدو او بیر لحظه سویان قیشقیردی ،

ایسته دیم شعری عروض ایله یازام بیر کلمه ،

قیشقیریق سالدی یاپیشدی هیجادان قیشقیردی ،

شاعیر : استاد هوشنگ جعفری

اؤز اوتوندا یاندیراسان + هوشنگ جعفری

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

من ایستییرم منی سن اؤز اوتوندا یاندیراسان

گولوم نه واخت گلیسن گوللری اوتاندیراسان

منی تصدق ائدیب باشیوا دولاندیراسان

چیخیم چیخیم دادی جان ، جان کنیشلیک عالمیدی

گؤزوم یولوندا قالیب قورخورام یوباندیراسان

او قدری گؤزله میشم گؤزلریم ده گؤز گؤزه دی

گؤزتلیرم گله سن غملری تالاندیراسان

چوخ ایسته ییللر منی اؤزگه اوتلا یاندیرالار

من ایستییرم منی سن اؤز اوتوندا یاندیراسان

ازل بلالی باشی بیر قویان دیزین اوسته

سورا زمانه نی بیر ، قی باخیب دایاندیراسان

چیچکلنر گول آچار سن گلنده شانلی چمن

او لاله لی چمنه عطریوی جالاندیراسان

یاشیل باخیشلی گونش وورغونو اولان گوندن

اورک سئویر گله سن عالمی اویاندیراسان

گؤزومده سنسیز اولان لحظه لر دنیز تؤره دیب

بلالی بحر سنی ایستییر کی چالخالاندیراسان

گلنده هر کسه بیر دسته در گونش گولو گل

کی عشقین اهلی لرین عشقه آرخالاندیراسان

سؤز اهلی سن ، سنه بو شوریلن یازیر شاعیر

حئیف دگیل بو سؤزو غیر اهله قاندیراسان

صبا ، سنین گلیشین موشتولوق وئریبدی منه

دئییردی سن گله جن شعری فایدالاندیراسان

شاعیر : اوستاد هوشنگ جعفری

قومری دوشونده + هوشنگ جعفری

دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

قومری دؤشونده گیزله دیب اؤز ترانه سین

قیش گلدی شاختا آلدی اله تازیانه سین

گوللر سارالدی توکدو بوتون برگ و دانه سین

داغلار دوماندی گؤز گؤزو گؤرمور گزیر سونا

اؤز دیمدیگیله ایشله دیگی آشیانه سین

بولبول اؤز عادت ائتدیگی گولزاری آختاریر

نه گوللرین اؤزون گؤرور نه نشانه سین

قارغا قونوب آغاج باشینا صحبت ائیلییر

قومری دؤشونده گیزله دیب اؤز غم ترانه سین

بیر دسته قارغایا قوشولوب عندلیب لر

آلقیشلامیر آدام قارا گلمیش زمانه سین

قلبیم دولوبدو ساقی سن آللاه شراب وئر

مطرب ده سازلاسین یئنه چنگ و چگانه سین

بیر اؤلکه ده کی میللته آزادلیق اولماسین

نئیلییر آدام او اؤلکه ده قارون خزانه سین

آل باشیمی دیز اوستونه زولفون تُک اوستومه

قوی گؤز گؤزه دییم سؤزومون عارفانه سین

عشق عالمی او زولف پریشانه بنزه ییر

هر کیم صداقت ایله گئتمه دی ، سیندیردی شانه سین

شاعیر دی جعفری ده بوتون اهل دل کیمی

خوش ذووق لر سئویر غزلین عاشقانه سین

شاعر : هوشنگ جعفری

آنامین سسینده صداسیندایام – هوشنگ جعفری

آنامین سسینده صداسیندایام

دولانیب گلمیشم شاهباز کندینه

اوشاقلیق حالیندا هاواسیندایام

دیرماشیب چیخیرام بیر اوجا داغا

ایکی دونقا داشین آراسیندایام

داش اوسدن باخیرام داش اورکلره

شاختادان سارالان گول چیچکلره

ائله غرق اولورام گئچه جکلره

بیلمیرم دونیانین هاراسیندایام

ننم دیر سسله نیر آی اوت آپارمیش

داشدان اَن دوشرسن کوره گی یانمیش

دییه سن جیندی بو ، عومرو تالانمیش

آنامین سسینده صداسیندایام

بو تایدا بولبوللر چکیلیر دارا

او تایدا سئللرده بوغولور سارا

بوتایین گونلری او تایدان قارا

بو قارا گونلرین چاراسیندایام

بو تایدا سولاری بولاندیردیلار

او تایدا دوورانی دولاندیردیلار

حاقّی آل قانینا بویاندیردیلار

حق ایله باطیلین داواسیندایام

بو تایدا آتالار آلچاقلیق سؤیور

او تایدا آنالار سینه سین دؤیور

بئله بیر زاماندا اوره گیم اؤیور

دوشموشم بیر چوخور چالاسیندایام

قوزغونلار توخلوقدان قاش – گؤزون آتیر

کهلیک لر آجیندان چینکدان ساتیر

هئی حقدیر گؤرورم ناحقدن باتیر

منه باخ اومیدلر جاداسیندایام

نیسگیل لر گتیردی دیله بولبولو

کؤکسوندن آلیشیر چیله بولبولو

یاندیردی دؤندردی کوله بولبولو

اودلانان بیر قوشون یوواسیندایام

گئدیرم سسیمی آردیمجاق سالین

گئدرگین ، سالامات قالین

آردیمجاق اوینایین اوخویون چالین

بابکین قارتاللی قالاسیندایام

شاعیر : اوستاد هوشنگ جعفری

اؤلسم سنین قاپیندا قازارلار مزاریمی – هوشنگ جعفری زنگانلی

اؤلسم سنین قاپیندا قازارلار مزاریمی

ای صوبح آچیل دوباره گؤروم نازلی یاریمی

حظ ائیلیرم گؤرنده من اول با ویقاریمی

بیلمم کی قارا گؤزلری نین وار نه حیکمتی

الدن آلیر توانیمی ، صبر و قراریمی

دوزدوم سه لایه تخته یه رنگ و قلملری

ترسیم ائدم اورک ده کی نقش و نیگاریمی

اوّل قارا گؤزون گتیرم تابلو اوستونه

زولفون چکنده یادا سالام روزگاریمی

آهو باخیشلی گؤزلرینین حالتین چکم

بیر یول تؤکم بوم اوستونه دار و نداریمی

طراح لیغیندا هر نه گوجوم وار نشان وئرم

مبهوت ائدم ایشیمده من اؤز اوستا کاریمی

مانی دوروب الیمدن اؤپوب آفرین دییه

صورت چکنلر ائیله یه تحسین چیخاریمی

کؤنلوم سئویر کی منبع ایلهامیم اولان منه

سندن توان آلیب یارادام شاهکاریمی

گر اؤلکه میزده بیلسه له من عاشیقم سنه

اؤلسم ، سنین قاپیندا قازارلار مزاریمی

جنتده خالیقیم دئسه بو حوریلر بو سن

گؤرسم قویوبلار اؤز الیمه ایختیاریمی

آلسا خبر گول اوزلولرین هانسین ایستی سن

آغلار گؤزیله من دییه جم اؤز نیگاریمی

شاعیر : اوستاد هوشنگ جعفری