خلیل رضا اولو تورک زندگی نامه سی و تبریزیم شعری


دوزلو اوغلان وبلاگلارینین یاخشی اولماقی اوچون آتیل باتیل فروشگاهین دان آلیش وئریش ائدین

 

خلیل رضا اولو تورک

شاعير، تنقيدچي، ادبيات شوناس، 1954-جو ايلدن يازيچيلار بيرليگي نين عوضوو، فيلولوگييا علملري دوکتورو (1985)، آپاريجي علمي ايشچي (1969)، آذربايجانين امکدار اينجه صنعت خاديمي (1986)، م.ف.آخوندزاده آدينا ادبي موکافاتين لاورئاتي (1991)، آذربايجانين خالق شاعيري(1992)

1932-جي ايل اوکتيابرين 21-ده ساليان رايونونون پيراببه کندينده آنادان اولموشدور. ساليان شهرينده 2 نؤمره لي اورتا مکتبي بيتيرديکدن سونراADU-نون فيلولوگييا فاکولته سينيين ژورناليستيکا شؤعبه سينده تحصيل آلميشدير (1949-1954). امک فعاليتينه  ” آذربايجان قاديني “  ژورنالي رئداکسيياسيندا ادبي ايشچي کيمي باشلاميشدير (1955-1957). موسکوادا م.قورکي آدينا ادبيات اينستيتوتو نزدينده کي  عالي ادبيات کورسلاري نين موداويمي اولموشدور (1957-1959)، سونرا APİ-ده باش موعليم ايشله ميشدير (1959-1960). آذربايجان EA نيظامي آدينا ادبيات اينستيتوتوندا باش علمي ايشچي وظيفه سينده چاليشيردي (1969-جو ايلدن).  ” گوناي “  قزئتيينن باش رئداکتورو اولموشدور (1993-جو ايلدن). ايلک مطبوع شعري –  ” کيتاب “  1948-جي ايلده  ” آذربايجان پيونئري “  قزئتينده درج اولونموشدور. بو واختدان دؤوري مطبوعاتدا شعرلري، ادبي تنقيدي مقاله لري ايله مونتظم چيخيش ائتميشدير.  ” بيليک “  جمعيتي نين خطي ايله اؤلکه ميزين شهر، کند و قصبه لرينده بديعي ادبياتين آکتوال پروبلئملرينه داير موهازيره لر اوخوموش، آذربايجان و دونيا مدنيتيني تبليغ ائتميشدير. دونيا پوئزيياسيندان ترجومه لريني  ” توران چلنگي “  (1992) کيتابيندا توپلو حالدا چاپ ائتديرميشدير. آذربايجان يازيچيلاري دسته سي ترکيبينده تورکييه ده سفرده اولموش (1968)، اؤزبکيستاندا کئچيريلن آذربايجان ادبياتي و اينجه صنعتي اون گونلوگونده ايشتيراک ائتميشدير (1980).  ” بيليک “  جمعيتي نين ديپلومو ايله تلطيف اولونموشدور (1983).

آذربايجانين آزادليغي و موستقيلليگي اوغروندا موباريزه ده فعال ايشتيراک ائتميش، 1990-جي ايلين يانواريندا حبس ائديليب موسکوادا لئفورتووو زيندانيندا 22 آي ساخلانميش، ايجتيماعيتين و خليل ريضا مودافيعه  کوميته سي نين طلبي ايله آزادليغا بوراخيلميشدير.

1994جو ايل اييونون 22-ده وفات ائتميش، باکيدا فخري خياباندا دفن اولونموشدور.

اودَر يوردو

باشيم،بئينيم توستوله نير،وارليغيمدا کدر،تلاش.

گؤزلريمده ايلديريمدير داملا-داملا آخان قان ياش.

من يئنيدن دوغولماسام،داشام،اينان،قوپ قورو داش.

طاقتيم اول،غئيرتيم اول،قوي ديرچه ليم ياواش-ياواش.

سنسن حسرت گؤزلريمين هم قاراسي،هم ده آغي.

قايتار منيم قودرتيمي،اودَر يوردو،اود تورپاغي!

واريم-يوخوم،جيسميم-جانيم تبريزيمي ايتيرميشم.

باغ-باغچامي،گولشه نيمي،نرگيزيمي ايتيرميشم.

يئتيم قالان بير دالغايام دنيزيمي ايتيرميشم،

دوردانه مي،يئگانه مي،عزيزيمي ايتيرميشم

ايتيرميشم باشيم اوسته کهکشاني،چيلچيراغي

قايتار منيم چيراغيمي،اودر يوردو ،اود تورپاغي!

جوت قولومو چيينيمدنجه ووروب سالدي قاري دوشمن.

آرخاسيندا قوجا گورزه-قيزيل خاللي ساري دوشمن.

يوردومون دا ايچريسي ياري دوستدور،ياري دوشمن.

سيليب حيات کيتابيندان تامام ناموس،آري دوشمن

کؤمگيم اول،آچا بيليم دوردولاشيق بير يوماغي،

قايتار منيم چيراغيمي،اودر يوردو اود تورپاغي!

الوان-الوان،خونچا-خونچا نئچه مزار،نئچه گولزار.

منه يارديم ائده بيلمز نه گؤز ياشي،نه آه و زار.

قهرمانلار معبديسن،ائي ابدي شانلي دييار.

قرنفيللر تونقاليندا يانار اودلار،سؤنر اودلار.

باشيمدا آغ تاجيم اولسون،ائنسين گؤيدن آغ بولودلار.

شيريم-شيريم پارچالاييم کثافتي،قارانليغي،

قايتار منيم جورأتيمي،اودر يوردو،اود تورپاغي!

سول بؤيرونده ناميق ياتير،ساغ الينده ائلشاد،آيدين.

اونلار جاندان کئچرديمي،سن اود ايچره يانماسايدين؟!

داش آلتيدان،خوجاليدان فرياديني عرضه يايدين.

ان غئيرتلي مردلريني هارايلادين،حايان سايدين

آتيلديلار جهننمه ايلک گنجليگين باهار چاغي،

موسکوادان گلن تانکلار شيريملادي بو تورپاغي.

قوربان اولوم من اونلارين قانا باتميش تئللرينه،

سيلاحسيز دا،توفنگسيز ده دوشمن بوغان اللرينه.

قوي دؤشه نيم،قوي اوز سورتوم سولموش مزار گوللرينه،

دوزولمه ميش،يا دوزولموش مرمري نين دان يئرينه.

سو سپ يئتيم آنالارين کاباب اولموش ديللرينه،

سو سپ،آزجا دورولسون قوي او گؤزلرين قان چاناغي،

قودرتيم اول،جورأتيم اول،ائي قهرمان اود توپاغي!

من بيليرم:دردلريني يومروغوندا سيخاجاقسان.

سن بو ديبسيز جهننمدن چيخاجاقسان…اوزو آغسان.

نورلو داغسان…ظولمت داغي دئويره جک،ييخاجاقسان.

بوغازيندان ياپيشاني بوغماليسان،بوغاجاقسان.

تبريزلري،علويلري سن يئنيدن دوغاجاقسان.

اؤز بطنيندن دوغاجاقسان ايستيقلالي،آزادليغي.

قودرتيم اول،ائي اوميديم،ائي قهرمان اود تورپاغي!

پلانئتين پايتاختي يوخ،باشدان-باشا پلانئتسن.

اون سککيز مين عالم سسلر،سن اؤزونسن،هارا گئتسن.

بشريت يوخا چيخار،ايتر-باتار بير گون ايتسن

اوددا يانماز،سودا باتماز،عرضه سيغماز بير ايگيدسن.

مين ايللرين آرخاسيندا اينسانليغين گور ماياغي،

بير ده آليش،بير ده پارلا،اودر يوردو،اود تورپاغي!

نه باغ آتا افسانه دير،نه نيظامي،نه ده بابک.

گؤزلرينه نعيمي نين،نسيمي نين شکليني چک.

حقيقتي دفن ائلمک ايسته ينلر گبره جک.

باغري يانميش قاراباغيم بير ده قالخيب گؤيره جک.

گؤيره جک چيچک-چيچک،لاله-لاله،لچک-لچک.

گؤزلريمين چئشمه سيله سوواريرام او نؤوراغي،

نؤوراغيمسان،بايراغيمسان،اودر يوردو،اود تورپاغي!

يوخ اؤلمه ييب،گؤمولمه ييب،داغ باشيندا داغدي مردلر

آل گونشين هاله سينده قاناد چارپير…ساغدي مردلر.

” بوق “  کلمه سي دادا چاتسين،علويليکده باغدي مردلر.

محو اولمادي،کايناتا شوعا-شوعا آخدي مردلر،

بو اينامدير سرينله دن سينمده کي  چارپاز داغي،

يوکسل،داغيم،داياغيمسان،اودر يوردو،اود تورپاغي!

باللي قايا…اريمگلدي…خاچيندربند…جيديردوزو…

خزينمدير يئرين آلتي،صاف آينامدير گؤيون اوزو.

او چؤللرده تبريزيمين ال هنيري،آياق ايزي…

قوي بوروسون قاراباغي گول سرگيسي،گول دنيزي.

آلاق دوشمن جايناغيندان سيرخاوندي،جانياتاغي.

ياتاغيم يوخ،اوتاغيم يوخ،وارليغيمسان، اود تورپاغي.

جيليزلارين،ياوالارين ميني ديمز بيرجه مرده.

آغ جيگرلر توز دا دئييل قهرمانلار اولان يئرده.

يوکسلديلر علويته دالغا-دالغا، پرده-پرده.

قوي  ” سئگاه ” ايم،  ” جاهارگاه ” ايم هاوالانسين بير ده،بير ده

دوشوندورسون…دوشونمه سه  سن اؤلموش بيل اينسانليغي.

سازيم،تاريم،سئتاريمسان، اودر يوردو، اود تورپاغي!

اينسانليغين واحيد يولو- اينسانليغا محبتدير،

کيملر بونو آنلاماسا بيرجه توربا چوروک اتدير.

ثروت،شؤهرت دوشگونلري دامار کسن کمفورصت دير،

پارلامئنتي موندارلايان خيانتدير، جينايتدير.

کيرپيکلري دولاشديران هيس، قوروم ساي قورومساغي،

داغيت ظولمت بولودلاري، نور قايناغي، اود تورپاغي!

قودورغانلار دينج دورماسا،داشقين،توفان اولاسييام.

ييرتيجيلار دونياسيني بورولغانا سالاسييام.

ناکام گئدن مردلريمين قيصاصيني آلاسييام،

اؤلسم بئله،بو عالمه من يئنيدن گله سييم،

آنالارين گؤزلريندن قانلي ياشي سيله سييم،

اينان منه ابدي سن ،ائي بشرين حاق بايراغي،

باتان،چيخان گونشيمسن،اودر يوردو،اود تورپاغي!

اورکلردن آلوو قالخير.-جان داشالتي!…جان خوجالي!

پولئميوتلار،توپلار جوشدو:-سوورول گؤيه،يان خوجالي!

داغين،داشين باشدان-باشا قان دنيزي،قان خوجالي!

او دهشتي،او وحشتي مين ايللرله آن،خوجالي!

شلاله لر قانا دؤندو،قان-ياش گؤردوم هر بولاغي.

بوينو بوکوک بنؤوشه ني کيملر قيردي،اود تورپاغي؟

سونگولره کئچيرديلر يوز اوشاغي،مين قونداغي.

آغساققالي،آغبيرچگي،آي اوزلونو،گول دوداغي.

اود قاريشيق کوله دؤندو يون شالي نين هر ساچاغي،

اوچدو،قوندو بولودلارا ايگيدلرين چال پاپاغي.

اونوتمازسان او پاپاغي،اودر يودو،اود تورپاغي!

قارانليقدا اوغرو کيمي يوردا گئجه گيردي اونلار،

اولدوزلاري گوللـه له ييب گؤيدن يئره سردي اونلار.

بئشيکلردن تر قؤنچه ني،ايلک نوباري دردي اونلار،

چوجوقلارا امزيک دئييل،اود لوله سي وئردي اونلار.

ايستي کوله دؤندرديلر بار اوستونده مين بوداغي،

اونوتمازسان او آلچاغي،اودر يوردو،اود تورپاغي!

اود پوسکورن قيزميش تانکلار آيي،گونو باسدي،کئچدي.

قصرلري ويران قويوب بولودلاردان آسدي،کئچدي.

اؤيله بيلمه دمير اوسته مورگه نه دي،پاسدي،کئچدي.

مورگه نه لر آرزو دولو اورکلري هدف سئچدي،

ظولمت نورو يارالادي،آلچاق اؤوجو،قارا آغي.

ياندير سؤنن چيلچيراغي،اودر يوردو،اود تورپاغي!

دونموش تورپاق-قورو تاختا،قان سينمده لاختا-لاختا.

قارمي دولان گؤزلريمه،يا چووويان چووغون،شاختا؟

کؤرپم مي دير سود آختاران،دؤش آختاران قارانليقدا؟

کيچيک،تونبول اللريله ايسينيرم من بو واختدا.

قان ايگينه قاچدي،گلدي…سئير ائله آج يالقوزاغي.

قان امَري،سودامَري اونوتمازسان،اود تورپاغي!

گلينلرين آياغيني جورابييلا باغلاديلار،

دوزوب خندک کنارينا ديز اوستونده ساخلاديلار.

ارنلرين تونج آلنيني آوتوماتلا داغلاديلار.

قاچانلاري مئشه ليده،جميللي ده حاقلاديلار.

قانلي بيچاق قامارلادي جوت سيرغالي جوت قولاغي.

هاني زومرود بويونباغي،اودر يوردو،اود تورپاغي!

سن بشره بخش ائتميسن سون تيکه ني،ايلک روزونو.

اؤز الينله يانديرميسان اؤزگه لرين اولدوزونو.

سؤيله،کيمدن اسيرگه دين چؤرگيني،يا دوزونو؟

قوروموسان غربين،شرقين عزتيني،ناموسونو.

خانکندينه سيغيشمايان ياخشيليغين بويموش سونو.

ايمداديما چاتا بيلمز نه اوخشاما،نه بير آغي.

مين يارامين ملهمي اول،اودر يوردو،اود تورپاغي!

بو موصيبت نه داخاي،نه اوسوئنسيم،نه خاتيندي.

قورشونلانان زر قلملي دان اولدوزو سالاتيندي.

يهرلري قانا باتميش قيراتيندي،دوراتيندي.

ياددا ساخلا:داشناک سنين ان رحمسيز جللاديندي.

بوغازيندا کمند اولدو کؤرپه لرين بلک باغي،

اوغرادين روس زاوالينا،اودر يوردو،اود تورپاغي!

ياددا ساخلا قوجا تاريخ من تورک اوغلو اولوتورکم.

اهريمنلر قارشيسيندا سانما چؤکم،بوينو بوکم.

بيرجه کيشي قالسام بئله،گومان ائتمه يالقيز،تکم.

من-دوننم،من-بوگونم،گله جگم،يئرم-گؤيم.

حضرت علي قيلينجي يام،اوددان گرک بير قين گئيم.

کسيب کئچم خيانتي،جينايتي،آلچاقليغي.

عشقيم،حوسنوم،جلاليمسان،اودر يوردو،اود تورپاغي!

آند ايچيرم تبريزيمين گونش بويدا مزارينا،

دونن سولان،بوگون بير ده چيچکله ين گولزارينا.

آند ايچيرم ايلک گلينيم سئوينجيمين آه-زارينا،

گؤز ياشيندان خال-خال اولموش آلايانيق قوللارينا!

آند ايچيرم خوجاليمين قاپاديلميش يوللارينا،

يارپاغيندا اينسان قاني…خينالانميش کوللارينا:

داش گميريب،قوم يئيه جک يوردوما گؤز ديکن ياغي،

اوجال،يوکسل،اودر يوردو،سن ائي حاقين آل بايراغي!

اهريمنلر يوواسيني دارماداغين ائده جکسن،

قالخيب صاباح آيا،مارسا،اولدوزلارا يئته جکسن.

آلتي ميليارد اينسانليغام،قاري دوشمن،سنسه تکسن.

زهر ساچان بير افعي سن،تور قوران بير هؤرومچکسن،

تپيگيمين آلتينداجا گبره جک،اؤله جکسن.

تبرريکيم،توتيام بيل قاراداغي،قاراباغي.

يوکسل گونش مؤوقئعيينه،اودر يوردو،اود تورپاغي!

باشين اوسته کاروان يولو…کاروان دئييل،اودرواندير.

شهيدلرين آل قانييلا قؤنچه-قؤنچه،آل-الواندير.

مالي بيلي بيرجه اوووج تورپاق،يوخسا آسيماندير؟

کهکشاندير،هر اولدوزو شؤله وئرن قهرماندير.

بو دونيادا قالان آنجاق ياراداندير،ياشاداندير.

سنين حؤکمون ياراتميشدير جاهان بويدا طمطراغي،

جاهان کيمي ابديسن،اودر يوردو،اود تورپاغي!

قولوم اوسته شيرين-شيرين ياتميش ايدي…اويانديمي؟

-آتام!-دئييب اطرافينا گؤز ياشييلا بويلانديمي؟

دوققوز قاتلي عيمارتي سيلکله دي فرياديمي؟

اؤپتوم تونبول آياغيندان،اؤپتوم کيچيک يومروغومدان.

اووونمادي…کيمي اومدو،کيمين چکدي او،آديني؟

اونا نه جور جاواب وئريم بو دان اوزو،بو صوبح چاغي؟

اؤزون اوووت او کؤرپه ني اودر يوردو،اود تورپاغي!

خليل ريضا اولوتورک،

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: