عومرومدن بیر آن – نصرت کسمنلی

عومرومدن بیر آن

عومرومدن بیر آنی اوغورلامیشیق

قاچیب بؤلوشوروک بو خلوت یئرده

پاییزدان آیریلان کوچه ری قوشوق

کیم بیلر بلکه ده گؤروشدوک بیرده

بؤشالیر اوره یین دولور گؤزلرین

کئچیتمیش زامانی لعنت له ییرسن

دولاشیب دیلینده قالیر سؤزلرین

اؤزونده بیلمیرسن نه ایسته ییرسن

اؤرتور گؤزلرینی یوخو خوماری

یوخون ساچین کیمی قاریشیق دوشور

فیکیرلی کئچیرسن ، بوگون یوللاری

عنوانین ، آدیملا ، دولاشیق دوشور

ده لی تک داش آتدیق بو ساکیت گوله

او داشی گئریه ، قایتارماق اولمور

بیزیم یالانیمیز ، یئرییر هله

ائله یئرییر کی ، ایزی ده قالمیر

آچادا بیلمیریک سیرری هئچ کیمه

ائله گیزلی گیزلی ، آلیشیریق بیز

بلکه ده بیر دوغرو سئوگی عشقینه

مین یالان اویدوروب دانیشیریق بیز

شاعیر : نصرت کسمنلی