آغ آتیم – استاد هوشنگ جعفری


آغ آتیم

آغ آتیم ، قول قاناتیم

آت قدمین یورتما یئری !  ——– >  یورتما یئریمک = آت یئریشی

آش تپه لردن

سیلدیریم تک سره لردن

سئله سینمیش دره لردن

بو نه طوفاندی گؤزل کهلیگیمی

ایستییر آییرسین فره لردن ——> فره = کهلیک بالاسی

غیرتیم جوشه گلیر غملی خبردن

آغ آتیم – قورخما خطردن !

آغ آتیم ، قول قاناتیم

شیهه چک ، قوی سسیوه

بلکه یاتانلاردا اویانسین

یاتماغین واختی دگیل دورسون اوتانسین

یاتانین عؤمرو تالانسین

تازا نعلین وار آتیم

چال بو داغین سینه سینه ، قوی پارالانسین

چال داغین سینه سی باتسین ، یارالانسین

داشی داشدان ، آرالانسین

آغ آتیم قول قاناتیم

داش قایادان آشما چتیندی

قاباق اوز یوققوشادی ، قاشما چتیندی

داغا دیرماشما چتیندی

داشا ، سووخاشما چتیندی  ———-> سووخاشما = دیرماشماق

باخما یوللاری چتیندی ، اورانین هیبتی یوخدور

آغ آتیم همت ائله !

غیرتی یوخدور

هله اوز یوققوشالار چوخدو قاباقدا

آشماق اولماز بو آیاقدا

آغ آتیم قول قاناتیم

بسدی ایاق ساخلاما ، گون باتدی قارالدی

گون گئچیب داغ دالینا رنگی سارالدی

داغین اوستون دومان آلدی

آغ آتیم بس بو نه حالدی ؟

بورا یارقاندی آتیم دورما آماندی … —–> یارقان = یارغان = اوچوروم

آغ آتیم ، قول قاناتیم

آت قدم آیدینلیغا ساری

هورکوشن اوولاریلان ،  —-> هورکوشن = قورخوب قاچان

(( اوو = آو ، صید ، شکار « عوام تصوروندا (آو) فارسیجا آهو نون مخفف تلفظو دور و بو نه یالنیشدیر ))

چیخ سره یاللاری یوخاری —-> سره یال = سره ، گدیک

قار قالان داغلارا سال بیر نفسین

قوی اریسین بوز کیمی چیگنینده کی قاری

سولاری آرخلارا سال بلکه سووارسین

قوری قالمیش مومالاری

قوی بؤیوک گؤلده اوزوشسونله یاشیل باش سونالاری

آغ آتیم

جهد ائله باری

سنی تاری !

آغ آتیم ، قول قاناتیم

طبعیمین دریاسی جوشقوندو

یئل اسدیر لپه لنسین

قوی چالیم صخره لره دالغامی ، —–> دالغا = شپه ، موج

دالغام سپه لنسین

قوی یاغیش تک قورویان

داغلارین اوستونده اله نسین

هرزه اوتلاری آپارسین

لالا بیتسین

هاممی گوللر تزه لنسین

گول و بولبول یییه لنسین

آغ آتیم ، قول قاناتیم

آت قدمین قلعه بابکدن آشاق

قارا گونلن ساواشاق

آت گولوندن سس آتیب ، بابکین حالین سوروشاق

یئنه طوفاندا جوشاق

دریالار تک قووشاق

قوووشوقدان سوووشاق ——> قوووشوق = چایلارین قوووشان یئری

آغ آتیم قول قاناتیم

شیهه چک قوی سسیوه

هاجرینی ترکینه چکسین نبی گلسین

قوی کور اوغلو آتینی داغلارا سالسین

ائشیدیب شیهه نی گلسین

الده کسگین قیلینجیلا

بویاسین قانه کئچل حمزه نی گلسین

قوی کرم سازینی سالسین دؤشونه ، چؤللره دوشسون

های سسی ائللره دوشسون

دئگیلن غملی کرم ایستییر اگر ، اصلینی گلسین

دشمنین بلکه کسک نسلینی ، گلسین

قوی بو داغلاردا بؤیوک هلهله دوشسون

داغلارا ولوله دوشسون

آغ آتیم ، قول قاناتیم

منه بیر قالغی بابامدان ، بو وئریلدی ، بونو چیگنیمه ساللام

قارا داغ باشینی آللام

اورا بیر ولوله ساللام

آغ آتیم دورما ، یوبانسان ، دالی قاللام

آغ آتیم قول قاناتیم

بیز اگر قلعه سیمرغدان آشساق بیزه آزدی

باخما یوللار ناتارازدی

باخما بو قارلی دماوند ، بو قفقاز بو هرازدی

باخما داغدا ، هاوا دوتقوندو – آیازدی —-> آیاز = آیلیق و سویوق گئجه

باخما بو قیشدی بو یازدی

آغ آتیم آت قدمین دریا دایازدی —–> دایاز = کم عمق ، درین یوخ

دریانی گئچسن اگر شهر نیازدی

اوردا هر قان کی توکولدو یئره ، آزادلیغی یازدی

بشر آزادلیغا بازدی !

آغ آتیم ، قول قاناتیم

اوردا دؤلبر چین اوتو دؤرت پر آچیبدی

اوردا دیللنمگه دیل تازه شیرین دیللر آچیبدی

اوردا باغلاردا بوتون گوللر آچیبدی

آغ آتیم

آت قدمین

آیدینلیغا ساری !

شاعیر : اوستاد هوشنگ جعفری

2 Cavab

  1. […] آغ آتیم – استاد هوشنگ جعفری […]

  2. سلاملار. عزيز دوست ائير ممكون اولسا هوشنگ جعفرين آغ آتيم ترانه سينين موزيكين بيزه يولياسوز. وبيزميزه لازيمدور.

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: