اوستاد هوشنگ جعفری دن بیر نئچه غزل


اوستاد هوشنگ جعفری دن غزللر:

زنجان تورک شعری و ادبیاتی آذربایجان شعر وادبیاتینین اؤنملی بیر قولودور بوردا مولانا همتی ، مولا محمدهیدجی ، شیخ اسماعیل ذبیحی ،باقر مسکن زنجانی ، امیر خسرو دارای ، تقی فاضلی ، محمد رضا روحانی ، میرزا واسع شهیدی ،دوقتور غولام حوسئین بیگدیلی، حوسئین منزوی ، حوکومه بیلوری ، ماهنی زنجانلی و داها یوزلر شاعیرلر چیخمیشدیر کی بو گؤرکملی شاعیرلرین بیریده گؤزل غزللرین قوشانی شاعیری و رسام هوشنگ جعفری دیر اوستاد جعفری نین غزللری دویغو و دوشونجه و دیل باخیمیندان کلاسیک غزللرین ایزینی ایزلمیر تکجه شکل وقالیب باخیمیندان کئچمش غزللرین اوسلوبوندادیر بو دئدیگیم فرقی بو موعاصیرلیگی غزللری اوخویاندان سونرا تصدیق ائدجک سینیز

کئفلی ،کئفلی ،

گونشدیر الده جامیم کئفلی ،کئفلی ،

اؤزوم کئفلی ، مرامیم کئفلی ،کئفلی ،

ییخیلمام ساقی تئز – تئز تؤک چاخیر دان ،

هله واردیر داوامیم کئفلی ،کئفلی ،

همیشه کئفلییم کئفسیزلر ایچره ،

کئچیر هر صوبح و شامیم کئفلی ،کئفلی ،

اورک وولکان کیمی اود توتدو یاندی ،

آلیشدی پیشدی خامیم کئفلی ،کئفلی ،

ایچیم یاندی آلیشدیم دفتر اوسته ،

آلوولاندی کلامیم کئفلی ،کئفلی ،

سن هر سمته دئسن من سجده قیللام ،

منیم سن سن ایمامیم کئفلی ،کئفلی ،

اگر سندن سووای بیر اؤزگه سیندن ،

خوشوم گلسه حرامیم کئفلی ،کئفلی ،

گولوم هر یئرده سن واردیر اوزاقدان ،

سنه چوخ – چوخ سلامیم کئفلی ،کئفلی ،

بوتون دونیاده عشق اولسون محبت ،

بودور آخیر پیامیم کئفلی ،کئفلی ،

شهریار گئدنده

باخدیم دالیسیجا یار گئدنده ،

بیر یولدا دئدیم باخار گئدنده ،

باخدی قاپیدان کئچنده گولدو ،

بیلمیردی اورک اومار گئدنده ،

باغلاندی دیلیم اورکدن آمما ،

آز قالدی چئکم (چَکم ین زنجان شیوه سی) هاوار گئدنده ،

گئتمه گئدیسن ؟ یاواش – یاواش گئت ،

جانیم بیلی سن چیخار گئدنده ،

دؤندر گؤزونو خومار – خومار باخ ،

قویما منی ده ، خومار گئدنده ،

سن سیزلیگه دوزمگیم چتیندی ،

گل جانیمی آل قوتار گئدنده ،

سندن سورا عشقی نئیلیرم من ،

آل عشقینی ده آپار گئدنده ،

مئهر ایله نوازش ائیله بلکه ،

گول بیتسین اورک ده قار گئدنده ،

من گؤر نه دئییردیم اؤز اؤزوملن ،

قول بوینوما بیر سالار گئدنده ،

بیچاره اورک بولود کیمین دیر ،

گؤردوکجه سنی دولار گئدنده ،

دای « جعفری » بسدی خلعت ،

سؤز اوستادی شهریار گئدنده ،

ایراندا هونر دیلنچی لیک دیر ،

باخما کی تاپار ویقار گئدنده ،

قرآن قیشقیردی

بیر گئجه آسدیلار آسلانلاری دان قیشقیردی ،

قورقوشوملار سینه سینده گول آچان قیشقیردی ،

زالی لار سوردولا دؤرت دؤره دن اندیشه لرین ،

قدد و قامت یئره دوشدوکجه آذان قیشقیردی ،

قیزلارین ناله سی قووزاندی بولودلار دؤشونه ،

هاوالار شاققیدی گؤردوم ساوالان قیشقیردی ،

قارالیقلاردا قارانلیق تؤره دن بایقوشلار ،

چاپدیلار آیه لر اوستونده ، قرآن قیشقیردی ،

بیری نین قیش تایاسین دامدا گامیشلار (جامیشلار ) سؤکدو ،

بیر آریق توخلو آجیندان باجادان قیشقیردی ،

گئجه بیر واقت بئله سونجولدو تیکانلار دؤشونه ،

وای دئیر کن دوداغین یومدو تیکان قیشقیردی ،

هر گئجه هر یئنی بیر بابکه نئشتر دگدی ،

آت گؤلوندن قارا قاشقا اوجادان قیشقیردی ،

داغلارین شیهه سی آز قالدی یئری شاققالاسین ،

قولاغیم باتدی دئدیم یئر گؤی الان قیشقیردی ،

سازی سیندیردیلا آل ماهنی لارین قوینوندا ،

هر سازین توزلو تئلیندن مین اوزان قیشقیردی ،

دری سین سویدولا گؤز باخدی ،دیلی آخ دئمه دی ،

سویولان گولدو او بیر لحظه سویان قیشقیردی ،

ایسته دیم شعری عروض ایله یازام بیر کلمه ،

قیشقیریق سالدی یاپیشدی هیجادان قیشقیردی ،

«نسیمی» نین قانی یام

منه حقارتیلن باخمایین ، غزل کانی یام ،

واراق – واراق داغیلان ائلده ، شعر دیوانی یام ،

منیم ویقاریمی گئت ، چیلله خانه دن خبر آل ،

اخی فرج کیمی یم ، منده عشق سولطانی یام ،

یاشیل چمنده بیتن ، سینه داغلی بیر لا لایام ،

«فضولی» نغمه سی یم من ، «نسیمی» نین قانی یام ،

اولار کی عاشق دلخسته دیر ، تانیللا منی ،

بو اؤلکه ده اؤلن عاشیقلرین ، چیخان جانی یام ،

آری کیمی دولانین گوللر اوسته ، بار گتیرین ،

آنام دیلی شیره دیر ، من او شیره نین شانی یام ،

بو فخردیر منه تورکو ائلیمدی  ، تورکو دیلیم ،

منم بسیمدی فقط ، سهروردینی تانی یام ،

بیر حقی باتمیش ائلین سینه داغلی شاعیری یم ،

غزلچی « جعفری » یم ، اؤلکه مین آدی سانی یام ،

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: