تورکی بایاتیلار


تورکجه بایاتیلار

*)*)*)*)*)*)*)*)

عربلر آی عربلر

آیاغیندا جورابلار

عربه یورد وئرمه یین

عرب یوردو خارابلار

******************

آپاردی تاتار منی

قول ائده ر ساتار منی

یاریم وفالی اولسا

آختاریب تاپار منی

****************

بوردان بیر تاتار کئچدی

اوخونو آتار کئچدی

غم گلدی، غم اوستونه

گون گونده ن بتر کئچدی

**********************

لایلای بئشیگیم لایلای

ائویم-ائشیگیم لایلای

سن یات شیرین یوخودا

چکیم کئشیگین لایلای

********************

قوربانون قوزی اولسون

قوزونون یوزو اولسون

قوزودان قوربان اولماز

قوی آنان اؤزو اولسون

********************

بو داغلار اولو داغلار

چئشمه لی سولو داغلار

بوردا بیر ایگیت اؤلموش

گؤی کیشنه ر بولود آغلار

*******************

عزیزیم، بادا گئتدی

یئل ووردو بادا گئتدی

دوشمن بیر ایش ایشله دی

گنج عؤمروم بادا گئتدی

******************

گؤیلر بولودلو قالدی

قوشلار اومودلی قالدی

آچاری یار بوینوندا

گؤنلوم کیلیدلی قالدی

****************

آتیمیزی قوشالیم

داغی-داشی آشالیم

سن یاغیش اول، من بولوت

یاغارکن قووشالیم

*****************

فلكين ايشي دوشسون

آغزيندان ديشي دوشسون

اونوندا منيم كيمي

نامرده ايشي دوشسون

********************

فلكين قهري منه

گلميري رحمي منه

دولدورور غم باده سين

ايچيردير زهري منه

******************

فلكين داد اليندن

اولماديم شاد اليندن

ياپيشايديم ياخاندان

چكييديم داد اليندن

**********************

باشيندا دومان وار

اوره يمده غميم وار

منه جانيم دئيه ن يار

ايندي سانير مني ياد

*******************

شاليم قارا بوياندي

اوجو يئره داياندي

منيم آه وناله دن

چرخ فلك داياندي

*****************

عزيزي يم بو يارا

گئدر قالماز بو يارا

دوستا ياد دئمه ك اولماز

دوست هارا دوشمن هارا

************************

گوزوم قالدی او قاشدا

او کیپریکده او قاشدا

مجنون تک دلی گویلوم

گزیری داغدا داشدا

******************

من عاشیقم اهیم دیلر

گوز یاشیم اهین دیلر

یار ایله کئچن گونر

اولایدی اه ایندیلر

******************

آراز اوسته بوز اوسته

کباب یانار گوز اوسته

گوی منی اولدورسون

دانیشدیغیم سوز اوسته

****************

آغ الما قیزل آلما

تاقچایا دوزول آلما

بیلسئدیم یار گوندریب

ساخلاردیم یوز ایل آلما

*****************

آبی دونون آستانا

کهلیک گیریب بوستانا

قور خورام یاغیش یاغا

قارا تئل لر ایسلانا

******************

یار قاپینی آچیبدی

نیه رنگین قاچیبدی

دور گل، بیزیم باخچایا

گور نه گولر آچیبدی؟

******************

داغ باشینی ساری گؤردی

گؤز قامشادی تار گؤردی

جفاسینی من چکدیم

صفاسینی اغیار گؤردی

*********************

داغدا دومان یئری وار

قاشدا کمان یئری وار

بیر جوت نار ایتیرمیشم

سنده گمان یئری وار

******************

الیمده علمیم وار

قیزیلدان قلمیم وار

یاخیندان گوره نمیرم

اوزاقدن سلامیم وار

*******************

باشیمدا کلاهیم وار

سنین تک پناهیم وار

گوزگوردی ،گویول سئودی

منیم نه گناهیم وار؟

******************

سؤزی سؤزدن آلان وار

زولفون اوزه سالان وار

گئدیرسن تئز قاییت گل

گؤزی یولدا قالان وار

****************

حیط لری گولبسر

ایچینده گوللر اسر

من سنی چوخ ایستیرم

سن منی بیر مختصر

*******************

داغلار باشی قویون دیر

آی قیز بو نه اویون دیر

سنه موشتولوق وئریم

آچیلان آی تویون دیر

*****************

دردیوی دئ بیله نه

ایش باشینا گلنه

سیریوی دئمه کونلوم

هر اورویوه گوله نه

*********************

اوزه رلیک سن هواسان

هر بیر درده دواسان

درد قاپیدان گلنده

سن باجادان قوواسان

**********************

قاشلارین قیبله گاهدی

قیبله دئسم گوناهدی

داغلارا دومان چوکسه

اوداغ من چکن آهدی

***********************

عاشیق سؤزون گیزله در

سؤزون دوزون گیزله در

سن چمنه چیخاندا

لاله اوزون گیزله در

********************

گؤزلرین خومار ایندی

یاش توکر یومار ایندی

توک زولفون سینن اوسته

گورن نار اومار ایندی

*********************

آچیلارام گول کیمی

اوخویارام بولبول کیمی

گویولومه دگن اولسا

ساراللام سونبول کیمی.

************************

اولسون سنه جان قوربان

ای گوزل آذربایجان

سن سن منیم دیلبریم

اولماز سنه تای جانان

************************

باغچا میزدا قویی وار

سرین – سرین سویی وار

بیر دانا یار سئومیشم

گوزل حالی- خویی وار

*********************

عزیزیه م آلما یار

ائوده یالقیز قالما یاز

ال منیم ، اتک سنین

منی گوزدن سالما یار

********************

عزیزیه م، گوزوم یار

الیم سندن اوزوم یار

وعده وئردین گلمه دین

قوجاخلادیم دیزیم یار

********************

من عاشیغام، هر آیلار

هراولدوزلار، هر آیلار

باشیم جلاد الینده

دیلیم سنی هایلار

***********************

قارا دنیز قارادی

اوره ییمیز یارادی

بو آمان سیز یوللارین

سونو گؤرون هارادی

*)*)*)*)*)*)*)*)*)*)

حق سئل کیمی دریایا آخیب ، یول تاپاجاق دیر

داش  آتماق ایله  کیمسه  اونو   دونده ره بیلمز

دونیادا   قارانلیقلار      اگر    بیرلشه    باهم

بیر خیر داجا شمعین  ایشیقین  سوندوره بیلمز

مفتون امینی

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: