داها ناغیللارا اینانمیرام – نصرت کسمنلی

داها ناغیللارا اینانمیرام

چاپيب اوز آتيني آغ آتلي گئتدي
آتلاري شيمشکدن قاناتلي گئتدي
اوشاق يادداشيمي قاناتدي گئتدي
داها ناغيللارا اينانميرام من

ننه مين اينامي، دردي ناغيللار
نامرده آلداتدي مردي ناغيللار
بيزي يوخولارا وئردي ناغيللار
داها ناغيللارا اينانميرام من

اوشاق اووتماغا بير نوغول ايدي
سوزلرده ياشايان بير آغيل ايدي
ياخشي آداملاردا بير ناغيل ايدي
داها ناغيللارا اينانميرام من

((سيم- سيم))ي سوزله يوخ، زورلا آچديلار
تيلسيمي مين جوره يوللا آچديلار
هيم- جيمي موهورلو قوللا آچديلا
داها ناغيللارا اينانميرام من

فاطمالار آياغي کنديرده قالمير
خميريميز کوت گئدير، تنديرده قالمير
قارغالار تولکويه داها آلدانمير
داها ناغيللارا اينانميرام من

آجي حقيقت لر بال دادير ايندي
آري سي اولمايان بال ساتير ايندي
کئچلي ساچلي لار آلدادير ايندي
داها ناغيللارا اينانميرام من

ائله يوخولاردا آتلار کيشنه دي
دئولري قازانا سالديم، پيشمه دي
گوزله ديم، گويلردن آلما دوشمه دي
داها ناغيللارا اينانميرام من

یازان:  نصرت کسمنلی