دوزال کندی + ناغیلی


دوزال کندی

دوزال كندينه ايستر ورزقان- خاروانا يولوندان گئده‌سن، ايسترسه‌ده مرند- علمدار طرفيندن، تبريزدن آزي اوچ ساعات يولدور. بيز اوتن ايللرين بيرينده آذربايجانيميزين اقتدارلي و دويغولو تحقيقاتچي و شاعيري حاجي ميرزا رسول اسماعيل زاده جنابلارينا باش ساغليغي وئرمك مقصدي ايله سحر ساعات دوققوزدان بو كنده يولا دوشدوك. تحقيقاتچي دوستوموزده يرلي آتاسي نين اربعيني اوچون كندين جامع مسجدينده ياسا اوتورموشدور. يولون اوزاقليغينا باخماياراق، يازيچي يا باش ساغليغي وئرمك اوچون ايرانين بير چوخ شهرلريندن خصوصي ايله تهران، تبريز، قاراداغ ماحاليندان، جلفا، علمدار، مرند و كيمي… شهرلريندن، بو كنده دوغرو يولا دوشن‌لرين سايي آز دئييلدير. من خالد اوروجعلي‌پور، منصور عليزاده، ياشار آذر اوغلو ايله بيرليكده همين كنده يولا دوشوك. تبريزين طياره مئيدانيندان باشلاياراق چؤللريميزين ياشيلليغا بورونمه‌سي، بو ماتم آغريسي و آجيسينا بير آز تسكين ليك باغيشلاييردي.
اوتن ايللر قوراخليقدن و ياغينتي ليغين اولماماسيندان اولدوقجا، كدرله‌نن آذربايجان خالقي، بو ايلين بوللو ياغيشين ياغماسيندان و چؤللريميزين، داغلاريميزين ياشيل اؤرپه‌يه بورونمه‌سيندن اولدوقجا سئوينيردي. بو سئوينجي يوللاري آتلاياراق راست لاشديغيميز جاماعاتين اوزلريندن دويماق اولوردو.
علمداري اوتوب، قارا چايا دؤننده اوره ييمه خصوصي بير كدر ياغدي بو كدري بو غمي يازين طراوتي، گؤزه‌ل ليگي، چيچك‌لري خوش رايحه‌سي‌ده بئله آپارا بيلمه‌دي. يقين دوستلاريميز سوروشاجاقلار كي، گؤره‌سن بو كدر نه ايدي؟ اوندا بو سوروشماق لازيم دئييل، آنجاق قارا چايدان اصلاندوزا اوزانان يوللاري گئده‌ن بو كدرين نه اولدوغونو بوتون وارليغي ايله دويا بيلر. قارا چايين ياخينليغيندان باشلانان اينديكي ائرمنستان سرحدلرينه آدام باخديقدا، قديم اوغوز تورپاقلاريندا، اوغوز ائولادلارينين كدرلي طالعي هر نه دن آرتيق وجدانلي انساني ناراحات ائدير، اوره‌يينده قارا- قارا قانلار دويونله نير.
هامي خصوصي ايله بو سرحدلرين قيراغيندا يئرلشن ايران آذربايجاني اهاليسينده حتي بؤلگه نين ارگانلاريندا و مسئوللاريندادا، ائرمني لره بير نوع منفي باخيش واردير. اوراني گؤره‌نلر دئييرلركي، گؤره سن نه واختا قده‌ر ايكي مسلمان خالقين آراسيندا ائرمني چيباني دوروب قالاجاقدير. رحمت ليك اوستاد شهريار گؤزه‌ل دئيير:
دئمه داغ- داشدي سليمان سني مندن آييران شئي
بير چيباندير كي، چيخيبدير گؤز ايله قاش آراسيندا
دوزال كندي بويو اوزانان آراز چايي اوگون ساكت آخميردي، بلكه جوشوب- داشماق ايسته ييردي و اؤز جوشغونلوغو ايله، قاراباغ درديني يولدان اؤتن لرله بولوشدورمه يه چاليشيردي.
نهايت قاراباغ دردي ايله دوزال كندينه چاتديق .كند اهاليسي قوناق سئوه‌ر، مهربان و اصيل آذربايجانلي خصوصيت‌لريني داشييان انسانلار ايدي. اهالي نين سونسوز احترام و حؤرمت‌لري ايله مسجده داخل اولدوق.
ياس مجلسي‌نين واختي 5 ساعات مدتينده چكسه ده، مسجد ده ايينه سالماغا بئله يئر يوخ ايدي.ميرزا رسول اسماعيل زاده يه باش ساغليغي وئرمك اوچون بو مجلسده اولان شخصيت‌لردن، حاج آقا هريسي نژاد، دوكتور مجيد كاوه، شاعير جلال محمدي، مختار صدرمحمدي، حسين زاده، ادبياتچي مصطفي قلي زاده و اونلارجا روحاني‌نين آديني چكمك اولار.
عرشه‌خوانين و آيري شاعيرلرين شعرلريندن سونرا غير اختياري اولاراق يازيچي ميرزا رسول اسماعيل زاده، ميكروفن آرخاسينا كئچه‌رك، ده‌يرلي چيخيش ائديب و هر نه ييني رحمتليك آتاسينا بورجلو بيله رك، او مرحومه حصر ائتديگي شعريني اوخودو، او بونونلا هم اؤزونو، هم ده مسجدده كيلري درين تاثراتلار چولغادي، يئري گلميشكن آرتيرمالي‌ييق كي، ميرزا رسولون آتاسي كربلائي امير علي، آغا امام حسين (ع)- ين زيارتيندن قاييداركن، تبريز شهرينده اؤز دونياسيني دييشميشدير. الله اونا رحمت ائيله‌سين، مزاري نورلا دولسون.
اينديسه سؤزو گئده‌ن شعري اوخوجولاريميزا تقديم ائديب سؤزوموزو سونا چاتديريريق.
دوست آشينا گليب سني گؤرمه‌يه
گؤروشونه قوربان اولوم، آي دده
دور يولا سال قوناقلارين ((دئيه- گوله))
گولوشونه قوربان اولوم، آي دده
مزاري نين دؤوره سيني گول آليب
دوست- آشينا گليب، اله گول آليب
گولون عطرين كربلاده گول آليب
گولشنينه قوربان اولوم، آي دده
***
سنه اؤلمك هئچ ياراشمير ديريل گل
هر گون بيزه يامان گئچير بير ايل گل
يولون سالما ياندان دده سريل گل
گليشينه قوربان اولوم آي دده
***
نه بيله ايديم بو گؤروش سون گؤروشدور
نه بيله ايديم بو باخيش سون باخيشدير
نه بيله ايديم بو گئديش سون گئديش دير
گئديشينه قوربان اولوم آي دده
***
سن گئده‌نده دئيه- گوله گئديردين
دؤرد طرفين توتموش گوله گئديردين
نه عشق ايله امام (ع) گيله گئديردين؟
بو عشقينه قوربان اولوم آي دده

یازان:  بهروز ايماني

Advertisements

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: