آرازین شیکایتی – تورکی شعر


آرازین شیکایتی

آرازلا بو سحر گلديم اوز- اوزه
اؤ، چاغلايان زمان ياشيل بير دوزه
دئدي:(( شاعيرلردن شكايتيم وار
منيم چوخ غريبه حكايتيم وار))
دئديم كي:(( نه اؤلوب؟))
قوور ائتدي دردي
دئدي:(( ائل بير زمان منه دييه ردي:
آرازيم، آرازيم، آخان آرازيم!
سينه سي يادلارا قالخان آرازيم!
چاغلا كي، سن منيم اؤز وقاريمسان!
سئوينجيم، فرحيم، افتخاريمسان))
دئديم كي:(( ائله دير!))
دئدي:(( بس نييه
مني يازيرسينيز انصافسيز دييه؟
بير زمان طوفانلار كئچدي باشيندان
سني آييرديلار اؤز قارداشيندان
منمي سبب اؤلدوم؟))
دئديم:(( يوخ، آراز!))
دئدي:(( وطن ملكي كئچيرنده يازا
خوش عومور سورنده گنجه، مراغا
ائللر دوشمه ينده درده- فراقا
من ائله آخيرديم بو قرار ايله
شرفله، عزتله، افتخار ايله…
عصرلر دؤلاندي ساكت، طوفانلي
سوردي اؤز آتيني چوخ الي قانلي
آهيني ائليمين دويدوم دريندن
اؤنا يؤل گؤسترديم خدافريندن
وطنين دردينه كؤنول باغلاديم
سنينله بير گولوب- بيرگه آغلاديم
دئمه كي بير سويام، اوره كسيز چايام
من كي باشدان- باشا روحم، سئودايام
آز منه آچماييب سريني انسان
گيزلي ساخلاميشام اوني ياشيمدان
آيريليق اؤرتايا دوشندن بري
گزوب دؤلانديقجا دؤغما ائللري
آخشام غريبليگي يوردا چؤكنده
انسانين باغريني حسرت سؤكنده
منده اؤدلانميشام، منده يانميشام
كؤپوروب آخميشام، دالغالانميشام.))
دئديم كي:((ائله دير!))
دئدي:(( بس اؤندا
سنده بير قلم چال حقين يؤلوندا
دئه، يئته ر شاعرلر هي قانا- قانا
ايللردير كي مني، سالير بهتانا
مگر منمي دئديم- ظلمكار ياغي
قانلارا غرق ائيله، گئت، قاراباغي؟
مگر منمي دئديم شاه ايرانه:
– تيفليسي يانديروب ائله ويرانه
مگر منمي دئديم رضاشاهه، دور
آذري يوردونا سنده قان اوددور؟
مگر منمي دئديم وليعهده، گل
اؤدلار اؤلكه سينه سنده اؤل انگل؟
منمي ايسته ميرم يوللار آچيلسين؟
زنجيرلي، كونده لي قوللار آچيلسين؟
قطارا مينه نده ائللر ماكودان
سحر خبر وئرسين قيزيل باكودان
گون سورسين قاراباغ، قاراداغ ايله
ياشاسين بير عزيز خوش نوراق ايله
شاهتختي مهربان اهره چاتسين
كندلر آباد اؤلوب شهره چاتسين
عالملر شيرواندان تبريزه گلسين
بؤيوك صنعتكارلار اوز- اوزه گلسين
مگر آنالاري آغلار گوره نده
سينه لرده چارپاز داغلار گوره نده
من آخوب حسرتله اينله مه ديممي؟
گيزلي زمان- زمان دينله مه ديممي
دهقان قارداشينين اوره ك سوزيني؟
نه اؤلور بير كره ديندير اؤزيني
نه زمان سو دئدي اؤ يانا آخديم
الينه بئل آلدي، بوستانا آخديم
سويومدان جانلاندي باغچا، باغ منيم
سعييم، همتيمله بو تورپاق منيم
چئوريلدي صفالي ياشيل جنته))
دئديم كي:((ائله دير!))
گلدي حدته:
(( ائيله ديرسه، نه دن بس قانا- قانا
شاعرلر ساليرلار مني بهتانا؟
قالير بير طرفده ظلمكار ياغي
دئيرلر من بؤلديم آنا تورپاغي!))
دئديم كي:((دوغرودور!))
اؤ آخدي گئتدي.
قلبيمده يانغيلار بوراخدي گئتدي
خيالا غرق ائتدي بو حالت مني
اؤلدوردي دؤغروسي خجالت مني
آيريلديغيم زمان كدرلي چايدان
گورديم كي قارداشيم باخير اؤ تايدان
اؤ يئنه صادقدير اؤز عادتينه
گئدير شهيدلرين زيارتينه
دالغين آغير- آغير گون يونه لينجه
چكوب كاروانيني آخشام گلينجه
اولدوزلار گؤيلرده آليشدي ياندي
سانمايين نور ساچان، اؤ كهكشاندي
بوني قان قارداشيم بيلير هر زمان
منيم اوره گيمدير اوستينده يانان!

یازان:  محمد راحيم

Bir cavab yazın

Sistemə daxil olmaq üçün məlumatlarınızı daxil edin və ya ikonlardan birinə tıklayın:

WordPress.com Loqosu

WordPress.com hesabınızdan istifadə edərək şərh edirsinz. Çıxış / Dəyişdir )

Twitter rəsmi

Twitter hesabınızdan istifadə edərək şərh edirsinz. Çıxış / Dəyişdir )

Facebook fotosu

Facebook hesabınızdan istifadə edərək şərh edirsinz. Çıxış / Dəyişdir )

Google+ foto

Google+ hesabınızdan istifadə edərək şərh edirsinz. Çıxış / Dəyişdir )

%s qoşulma

%d bloqqer bunu bəyənir: